मेहमान और तोहफा

HADIYA / TOHFA (GIFT)

1. Imam Sadiq (as):
Tum log aapas mein ek dusre ko Hadiya (gift) pesh karo aur aapas mein mohabbat badhhao.
(Man La Yahzarahul Faqeeh, v3, p186)

2. Imam Sadiq (as):
…Aapas mein Tohfa (gift) diya karo taake tum mein oos se mohabbat paida ho. Tohfa dene se bugz (nafrat) o dushmani duur hoti hai.
(Khisaal, p41)

3. Imam Ali (as):
Uski Ayaadat karo (oos beemar ko milne jao) jo tumhari ayaadat nahi karta aur usko Hadiya bhejo jo tumko Hadiya nahi bhejta.
(Man La Yahzarahul Faqeeh, v3, p187)

4. RASULE KHUDA (saww) KAUN SE HADIYE PASAND KARTE THE

Riwaayat:
Rasule Khuda (saww) kisi ki bheji huwi (Hadiya / gift ki huwi) khushboo (perfume) aur shireeni (mithhaas / sweet dish) waapas nahi karte the.
(Man La Yahzarahul Faqeeh, v3, p186)

5. Rasule Khuda (saww):
Mujhe Paaye khane ki daawat di jaati hai to qubool kar leta hoo'n aur agar koi mujhe Paaye hadiya karta hai to usay qubool kar leta hoo'n.
(Man La Yahzarahul Faqeeh, v3, p186)

6. Imam Sadiq (as):
Ek doosre ko khane ka hadiya hamesha pesh karte raho aur bartan apne ahle hadiya (khana gift karne wale) ko waapas kar diya karo.
(Amaali - Shaikh Toosi, p388)

7. Rasule Khuda (saww): 
Jis bartan mein Hadiya aaye usay jaldi waapas kar do taaki Hadiya mutawatir (lagaatar / continuously) aata rahe.
(Man La Yahzarahul Faqeeh, v3, p186)

MEHMAAN

1. Imam Sadiq (as):
Jab tumhara (Deeni) bhai (bin bulaaye) aaye to usay wo kuchh pesh karo jo tumhare paas maujood hai aur agar usay daawat di hai to phir uske liye takleef (tayyari) karo.
(Wasaail ush Shia, v16, p330)

2. Imam Sadiq (as):
Rasule Khuda (saww) (ka ye dastoor tha ke wo) jab mehmaano'n ke saath khana khate the to sabse pehle haath badhate the (sab se pehle khana shuru karte the) aur sab se aakhir mein haath uthhate the (sabse aakhir mein khana khatm karte the) taake log (tasalli se) khaayein.
(Wasaail ush Shia, v16, p340)

3. Imam Sadiq (as):
Halaakat hai oos aadmi (mezbaan) ke liye ke wo jo kuchh apne bhai (mehmaan) ko pesh kare usay haqeer (kam aur halke darje ka) samjhe aur halaakat hai oos (mehmaan) ke liye jo usay haqeer samjhe jo kuchh usay pesh kiya jaaye.
(Wasaail ush Shia, v16, p329)

4. MOMIN KE GHAR MEIN ACHCHI TARAH AUR KHUSH HO KAR KHANA CHAHIYE AUR ZYADA KHANA CHAHIYE AUR KISI QISM KI KOTAAHI AUR SHARM NAHI KARNA CHAHIYE

Imam Sadiq (as):
Kisi shakhs ki kisi se dosti ka pataa is baat se chalta hai ke wo uske yahaa'n khush ho kar khana khaata hai..
(Wasaail ush Shia, v16, p333)

Imam Reza (as)

se sawaal huwa ke Peshaab aur Pa-khana (urination & toilet) ke baad Ghusl ka hukm kyun nahi diya gaya?

Imam (as) ne jawaab diya, "Peshaab aur Pa-khana ki insaan ko din mein kayi baar zarurat mehsoos hoti hai aur agar peshaab aur pa-khana ki wajah se ghusl waajib hota to logo'n ke din ka zyada hissa ghusl karne mein guzar jaata aur ye kaam insaan ke liye intehaai dushwaar (difficult) hota jab ke Allah ka qanoon hai 'Alllah kisi bhi nafs ko uski quwwat se zyada takleef nahi deta' (Surah Baqarah, Ayat 286).

Aur peshaab aur pa-khana ke bar-aks Janaabat kabhi kabhi taari hoti hai aur uska talluq insaan ki khwaish aur iraade se hota hai jisme insaan apni marzi se tabdeeli kar sakta hai.

(Ek aur sawaal ke jawaab mein aap ne farmaya) ...Pa-khana insaani giza ki badli huwi soorat hai jo ke ek raaste se daakhil huwi aur doosre raaste se nikal gayi.

(Uyoon Akhbaar ar Reza, v2, p224 & 225)

Discover Jaunpur , Jaunpur Photo Album

Jaunpur Hindi Web , Jaunpur Azadari